Fran?esku: situata n? Liban ?sht? e papranueshme, t? ndalet ky shkall?zim i tmerrsh?m
R.SH. – Vatikan
Një shkallëzim “i papranueshëm” për Papën Françesku, gjithçka po ndodh në Liban, ku valët e sulmeve izraelite kundër Hezbollahut kanë shkaktuar deri tani mbi 550 viktima ndërmjet civilëve dhe fëmijëve. Ndërsa numërohen të vdekurit në Bejrut, bien sirenat në Tel Aviv dhe shpërthejnë raketat libaneze në jug të Haifës dhe në zona të tjera të Izraelit, mbërrin thirrja e Atit të Shenjtë nga Sheshi i Shën Pjetrit, në fund të audiencës së përgjithshme, e pesëqindta e papnisë së tij.
“Më dhemb shpirti për lajmet që vijnë nga Libani, ku ditët e fundit bombardimet intensive kanë shkaktuar shumë viktima dhe shkatërrime”.
Të ndalet ky shkallëzim i tmerrshëm
Papa Françesku uroi "që bashkësia ndërkombëtare të bëjë çdo përpjekje për ta ndalur këtë shkallëzim të tmerrshëm". “Është i papranueshëm!”, ngriti zërin Ati i Shenjtë, duke treguar sërish afërsinë e tij me një popullsi, e cila vuan prej vitesh pasojat e krizës politike, ekonomike dhe sociale, që nga shpërthimi dramatik në portin e Bejrutit, në vitin 2020.
“I shpreh afërsinë time popullit libanez, që ka vuajtur shumë në të kaluarën jo të largët”.
Lutje për popujt në luftë
Nga Toka e Kedrave, mendimi i Papës shkoi edhe në territoret e popullsitë e prekura nga brutaliteti i konflikteve. Papa u lut për ta dhe kërkoi lutje.
“Të lutemi për të gjithë, për gjithë popujt që vuajnë nga lufta: për Ukrainën e martirizuar, Mianmarin, Palestinën, Izraelin, Sudanin, për të gjithë popujt e munduar. Të lutemi për paqen”.
Së fundi, Papa kërkoi lutje edhe për udhëtimin e tij në Luksemburg dhe Belgjikë, që fillon nesër e do të përfundojë të dielën, më 29 shtator.
