Papa ia beson Maris? shtegtimin n? Malt?, n? gjurm?t e Sh?n Palit
R. SH. - Vatikan
Pasditen e 1 prillit Papa Françesku shkoi në Bazilikën e Shën Marisë së Madhe, ku u lut para ikonës së Shën Marisë Salus Populi Romani. Asaj ia besoi mbrojtjen e shtegtimit të tij të 36-të jashtë Italisë. Si kreu lutjen, u rikthye në Vatikan.
Programi: dy ditë të ngarkuara me takime e biseda
Papa Françesku është në Maltë sot, në orën 10.00.
Dita I: Nga aeroporti shkon në Pallatin La Valletta të Mjeshtrit të Madh, seli e Mjeshtrave të Mëdhenj të Kalorësve të Shën Gjonit, që e ndërtuan në vitin 1571. Aty takohet me presidentin dhe me kryeministrin e vendit e më pas, i flet Trupit Diplomatik të akredituar në Maltë. Pasdite, vizita në shenjtëroren mariane Ta’Pinu në ishullin e Gozos. Në muzg, lutja me besimtarët në sheshin para shenjtërores më të rëndësishme.
Të dielën, Françesku do të takohet privatisht me jezuitët e Maltës dhe do të shkojë për t’u lutur në shpellat e Shën Palit, në Rabat. Ky është vendi, ku, sipas traditës, apostulli doli në breg pas mbytjes së anijes, në vitin 60 pas Krishtit. Vend tejet i rëndësishëm për krishtërimin në ishull, është vizituar edhe nga dy Papët e mëparshëm.
Pas ndezjes së një llambe kushtimi, Ati i Shenjtë do të lutet e do të përshëndesë 14 krerët fetarë të pranishëm, së bashku me të sëmurët e asistuar nga Karitasi. Pastaj, mesha në Sheshin e Hambarëve në Floriana, në orën 10.15, ndjekur nga Engjëlli i Tënzot. Pasdite, vizita në qendrën "Gjoni XXIII Peace Lab", në Hal Far, ku strehohen emigrantë nga Somalia, Eritrea dhe Sudani. Papa do të takohet me rreth dyqind prej tyre, në teatrin e hapur të strukturës. Në orën 18.15, parashikohet ceremonia e lamtumirës në aeroport, ndërsa mbërritja në Romë, në orën 19.40.
Motoja e shtegtimit apostolik të Papës Françesku: “Na trajtuan me humanizëm të rrallë”, është një verset i shkëputur nga Veprat e Apostujve. Janë fjalët e Shën Palit, me të cilat përshkruan pritjen që i bënë maltezët, atij e shokëve të tij të fundosur në brigjet e ishullit në vitet 60, gjatë shtegtimit që po i çonte drejt Romës.
Françesku është Papa i tretë që shkel në Maltë, pas Shën Gjon Palit II në vitet 1990 e 2001 dhe Benediktit XVI, në vitin 2010.
