Papa n? Japoni, si prij?s shpirt?ror universal
R. SH. - Vatikan
Në orën 9.00 me orën e Tokios, u hap Qendra e Shtypit, përgatitur për vizitën e Papës Françesku. Gazetarë e fotografë u ulën një pas një në hapësirat e caktuara e nisën provat për t’u lidhur me redaksitë e tyre, në mbarë botën, në ndjekje të kësaj ngjarjeje “historike”. Së paku 800, të akredituarit e shtypit.
Nga Papa pritet një mësim shpirtëror për të gjithë
Atë Joseph Naoki Momma, koordinator i përgjithshëm i strukturës së informacionit të Kishës vendase, njëri nga organizatorët e vizitës së Papës në Japoni, na pret me një lajm, që na kënaq pa masë: “Ndonjë ditë më parë morëm vesh - na thotë - se qeveria, më në fund, pranoi ta ndryshojë interpretimin e figurës së Atit të Shenjtë. Deri tani - vijon të shpjegojë- Papa shikohej si “Perandor i ligjit”, kurse tani, si “Perandor i doktrinës”, ose më mirë të themi, si prijës shpirtëror e moral në nivel universal.
Vijojnë vrullshëm përgatitjet
Duke vijuar të na njohë me përgatitjet, në pritje të Françeskut, atë Momma na flet dy fjalë edhe për Kishën e sidomos, për atmosferën e gëzimit. Shumë njerëz shpresojnë ta takojnë Papën - shton- e këtë e tregojnë qartë kërkesat gjithnjë në rritje të atyre, që duan të marrin pjesë në ngjarjet kryesore. Numri është plotësuar e tejkaluar aq, sa duhen marrë masa për t’i seleksionuar kërkesat.
Takimi i parë i Papës do të jetë ai me ipeshkvijtë
Është ngjarje historike - nënvizon atë Momma - shumë e rëndësishme për një Kishë, e cila ka shumë nevojë për inkurajim, që të mund ta vijojë dëshmimin e vlerave të Ungjillit. Prandaj takimi i parë i Françeskut, pak pasi arriti ndër ne, do të jetë pikërisht ai me ipeshkvijtë, në Nunciaturën apostolike. Në emër të të gjithëve, Papën do ta përshëndesë imzot Josepf Mitsuaki Takami, kryeipeshkëv i Nagasakit, kryetar i Konferencës ipeshkvnore japoneze. Janë tri, kryedioqezat metropolitane në vend, ndërsa dioqezat, trembëdhjetë. Katolikët në Japoni janë rreth 539 mijë, 0,42%, në gjirin e një popullsie me shumicë budiste e shintoiste. Po kaq, edhe anëtarët e Kishës protestante.
