Iraku: vazhdojn? v?shtir?sit? p?r bashk?sin? e krishter? n? Vend
R.SH. / Vatikan
Edhe pse sot Iraku nuk është më teatër persekutimi, siç ishte në të kaluarën, të krishterët e vendit vazhdojnë të jetojnë në kushte të vështira. Këtë deklaroi për mediat e Vatikanit Atë Karam Shahmasha, meshtar nga Fusha e Ninives, një nga zonat "më të dëmtuara gjatë themelimit të Shtetit Islamik, në vitin 2014, kur 120,000 të krishterë u detyruan të iknin nga Iraku.
Sot, prania e krishterë në zonë është zvogëluar në mënyrë drastike: sipas Atë Shahmashës, fshatra të tëra kanë humbur mbi 60% të banorëve vendas. Për më tepër, pavarësisht përmirësimit të përgjithshëm të sigurisë, diskriminimi vazhdon në nivel të lartë, veçanërisht në vendin e punës dhe në mbrojtjen e të drejtave të pakicave.
Megjithatë, bashkësia e krishterë në Irak po reziston dhe po angazhohet në mënyrë aktive për rindërtimin e vendit. Atë Karam thekson se "Kishat janë plot gjallëri, me pjesëmarrje në Meshë, aktivitete rinore dhe nisma, si Takimi Rinor Ankawa, në të cilin marrin pjesë qindra të rinj". "Përpjekjet e Kishës Katolike në arsim janë gjithashtu të rëndësishme, me krijimin e Universitetit Katolik të Erbilit, projektuar për të mbështetur pakicat dhe për të nxitur kohezionin shoqëror. Pavarësisht vështirësive, bashkësia e krishterë në Irak vazhdon t’i mbështesë vlerat e paqes e të dialogut dhe të ngrejë zërin që të dëgjohet në nivelin politik, në mbrojtje të të drejtave të njeriut - shpjegon meshtari.
