杏MAP导航

“HEBDÓMADA PAPAE”
NOTÍTIAE VATICÁNAE LATÍNE RÉDDITAE
Die tértio mensis Maii Anno Sancto bismillésimo vicésimo quinto

TÍTULI

Sábbato praetérito postrémo Francíscus salutátur. Cardinális Decánus Ioánnes Baptísta Re fúnera fáciens ait: “Fírmiter memorávit nos omnes esse fratres”.

Novendiália in Pontíficis suffrágium.

Concláve die séptimo mensis Máii incohábitur.

Vos sermónem Latínum audiéntes ex corde salútat Eugénius Murrali.

NOTÍTIAE

Die sexto et vicésimo mensis Aprílis in Petriáno Foro fúnera facta sunt Francísci, ducéntis quinquagínta mílibus hóminum et ex toto terrárum orbe participántibus. Post Missam féretrum ad Sanctam Maríam Maiórem est delátum. Refert Sílvia Guidi.

“Omnes, omnes, omnes” venérunt ut postrémo Pontíficem salutárent, usque “inter gentem versántem” atque “ómnibus cor reserántem”, quómodo asseverávit cardinális Ioánnes Baptísta Re, cardinálium Collégii Decánus, qui exsequiáli Missae pro Francísco Papa praesédit. Quaedam in homília áttigit ex duódecim pontificátus annis quae “mentes et ómnium corda” affecérunt: ipse enim “homínibus in difficultátibus versántibus persollícite subvénit”; “praeter modum” se trádere vóluit “ob óculos habens sanctum Francíscum Assisiénsem”; indeféssus itínera suscípiens et apostólicum opus, Francíscus – autumávit cardinális - “ex Evangélii sapiéntia nostrae aetátis questiónes collustráre indesinénter stúduit”. Ecclésia ínsuper “ómnium sit domus”; addúntur audítio, evangelizátio, creátum coléndum, adhortátio ad fraternitátem, ad pacem conciliándam.
“Dilécte Francísce Papa, nunc ex Te pétimus ut pro nobis ores atque e caelo Ecclésiam benedícas, Romam benedícas, totum terrárum orbem benedícas”, quod dixit cardinális. Post Missam féretrum ad Sanctam Maríam Maiórem est translátum, ut inhumarétur prope effígiem quae est Salus Pópuli Románi, cui devotíssimus fuit. Procedénte itínere, in utróque viae látere frequénti spectánte turba, círciter quadragínta mília hóminum ante templum adstábant eum receptúri, rosam albam gestántes: sunt páuperes, tecto caréntes, in cárcere inclúsi, ádvenae, ii sunt ómnium despectíssimi quos ipse, Christo óbsequens, diligébat.

His diébus Novendiália celebrántur in Pontíficis suffrágium, a Missa exsequiáli sumpto inítio. Réferunt Rosárius Tronnolone.
Die vicésimo tértio mensis Aprílis, álterae congregatiónis generális cardinálium témpore, Romae adstántium, post Pontíficis óbitum, novendiálium calendárium est statútum, scílicet sunt decréti novem dies Eucharístiae celebratiónum in ánimae Francísci Papae suffrágium. Prima Missa est ipsum funus. Consequéntes litúrgiae, praeter illas diéi quinti et noni, ómnibus praesto sunt, at quidam prae óculis sunt habéndi, illi vidélicet qui peculiáribus vínculis Románo Pontífici adstringúntur: qui sunt officiáles ac fidéles Civitátis Vaticánae, Ecclésia Romána, Capítula Basilicárum Papálium, Cappélla Papális, Cúria Romána, Ecclésiae Orientáles, partícipes Institutórum Vitae consecrátae et Societátis Vitae apostólicae.

NOTÍTIAE BREVÍSSIMAE

Die duodetricésimo mensis Aprílis, quintae congregatiónis generális témpore, Conclávis dies est statútus, scílicet dies Mercúrii séptimus mensis Máii.

Haec dicénda putávimus, próxima hebdómada evéntuum novórum erit narrátio. Valéte.