Na Trivandrum, Mgr Gallagher afungoli eteyelo moko ya mambi ma Nzambe
Nsango ya Vatican News
Sima ya kozala na bosepeli ya moto ya lokúmu Mar Ivanios mokolo ya mibale 15 ya sánzá ya sambo na Trivandrum, secrétaire ya Ngwende ya Santu-Petelo ya boyokani na Bikolo akendeki na St. Mary's Malankara Syrian Catholic Major Seminary, likindo moko ya Eklezia katoliko, po na bofungoli eteyelo na ye ya sika ya mambi ma Nzambe. "Tosangani lelo na molimo moko ya bomoko, ya boyambi pe ya botondi", elobaki Mgr Gallagher, na bolakisi ntina ya mokolo yango eye "ekotikala na lisapo ya Eklezia eye". Na milio 23 ya bandimi, ba katoliko bazali na nsé ya 2% ya bato na Inde, bakabwani na rite latin, syro-malabar pe syro-malankare.
Bwanya, bososoli pe bolingo
Na lisikúlu na ye, episkopo abiangaki bandimi bazalaki wana ya kokanisa na libula ya ntalo etikala na Eklezia syro-malankare eye, "na misisa na ye ya mozindo ya momeseno ya eklezia pe litatoli makasi o bikeke ebele, epesaka ntina enene na boyekoli, na kotangisa po ya molimo pe na mosala". "Na losambo, na boyiki mpiko pe na bomipesi, bakoko na bino batongaki ba misala biye bibongisi bomoyi pe masanga ebele", elobaki ye. Libula moko ekobenga bayekoli ya lelo na mokumba pe na bokobi nzela esili ebanda, na boluki tango inso bwanyá mingi, na bokolisi bososoli pe na kosala na bolingo.
"Botelemisi libanga ya yambo eye ezali liloba moko ya bomipesi na biso po na lobi. Eteyelo ya mambi ma Nzambe ekozala esika moko epayi wapi boyambi na mayele bikozua bilei na boyokani, esika moko ya bokanisi moko ya mozindo, boyekoli moko ya makasi pe bokoli moko na molimo ekoki kobongola", elobaki Mgr Gallagher.
Mgr Gallagher asúkisaki na bobiangi bateyi na bayekoli ya kotala liboso pe ya kokanisa eteyelo moko efungwama po ya banso, emipesi po "ya mosala, kimia pe bozongisi bondeko", ebongami po ya "kokutana na mikakatano ya lobi".
