杏MAP导航

Jean-René Bompolonga- Kinshasa

Akomaki na kiti etambuisaka ye na ndako ya makita Polo ya motoba, Papa François atikaki botangi ya liteya na sango Giroli, moto moko ya Secrétairerie d’Etat, na bolimboli ete akokoka te likolo ya kosukosu ezali kotungisa ye. Akobaki molongo ya liteya na mama ya likambo ezali « Yezu Kristu elikya na biso » mpe ebandaki mpo na mobu ya jubilé 2025 na likambo ya Botali.

Mokomi nsango elamu Luka akoloba botali ya Ngondo Maria, azalaki na zemi ya Yezu, epayi ya santu Elisabeth. « Kasi ezali mingi mpenza Yezu, na libumu ya mama na ye, ayei kotala bato na ye (cf. Lk 1,68), lokola elobi Zacharie na loyembo na ye ya bokumisi », ebandaki liteya ya Papa François.  

“Maria akoyoka bomati ya bolingo”

Papa alobi mingi likambo ya Maria ya kotelema mpe kokende na bokutani na basusu, likambo ekolakisa bomipesi na ye nsuka te, mosika na ye likambo ya kobanga mikakatano ya mokili.   

Na botali ye ya ndeko na ye, oyo azali na mokumba andimaka te likolo ya mbula na ye epusanaki, Maria ayei “kokabola boyambi na ye ya Nzambe oyo azanga ndelo mpe elikya na ye ya bokokisami ya bilaka”.

Bokutani ya basi mibale bazali na mikumba

Elisabeth akopesa losako na Maria na mapamboli mibale. (“Abenisi yo  yambo ya basi banso, mpe abenisi mpe Yezu mwana wa yo”) (Lk 1,42) na esengo moko (Esengo na oyo andimaki bokokisami ya bilaka maye balobelaka ye na Mokonzi” (v. 45). Na yango Maria akozongisa na bolobi mpo na ye moko te; kasi ya Nzambe. “Ayembi na botomboli mongongo nzembo ya bokumisi etonda na boyambi, elikya mpe na esengo, loyembo eye ekolobama mokolo na mokolo na Eklezia ntango ya losambo ya mpokwa, Magnificat”, elobaki Santu Papa.

Likanisi ya bozui bonsomi ya Israël ezali “ya kobombana” na losambo eye ebimi na monoko ya Maria, kasi losambo ena ekongengisa elikya ya oyo ekoya. Mpo na Papa, “Maria akoyemba ngrasia ya oyo elekaki, kasi azali mwasi ya lelo oyo akumbi lobi ekoya na nzoto na ye”.

Boyengebene ya Nzambe

Boponami ya Maria epayi ya Nzambe mpo akumba Yezu ezali na kati ya “ebele ya bolingo ya mawa ezali na nsuka te ‘na molongo ya bato’ (v. 50) na bato bakangami na bondeko”. Lisapo ena kati na Nzambe mpe na lisanga ya bandimi eyebani kobanda Abraham kino Yezu.

Na bosukisi liteya na ye ya mokolo, Papa François abengi moko moko ya bandimi ya kosenga na Mokonzi ngrasia “ya koyeba kozela bokokisami ya elako na ye inso mpe asunga biso ya boyambi Maria na bomoi na biso”. Pamba te, lokola santu Ambroise akomaka, elimo nionso ekondima mpe ekolikya “ekobongisa mpe ekobota Liloba ya Nzambe”.