Юбілей Місіянераў Міласэрнасці: 500 святароў з усяго свету
Аляксандр Амяльчэня - Vatican News
Місіянеры міласэрнасці – гэта асаблівае служэнне, устаноўленае Папам Францішкам падчас Надзвычайнага Святога Года Міласэрнасці ў 2015 годзе. Сёння ў свеце налічваецца 1258 такіх святароў, якім дадзена асаблівая кампетэнцыя адпускаць грахі, звычайна зарэзерваваныя для Апостальскай Сталіцы.
"Місіянеры міласэрнасці – гэта знак мацярынскага клопату Касцёла аб Божым народзе", - гэтыя словы з булы "Misericordiae Vultus" падкрэсліваюць важнасць місіі гэтых святароў. Яны прыбудуць з розных краін, уключаючы Італію, ЗША, Польшчу, Бразілію, Іспанію, Францыю, Мексіку, Германію, Славакію, Філіпіны, Бангладэш, Украіну, Калумбію і Індыю.
Праграма юбілейнай сустрэчы ўключае малітву ў Зале Паўла VI, міжнародную канферэнцыю на тэму "Прабачэнне як крыніца надзеі", цэлебрацыю "24 гадзіны для Пана" ў базіліцы Сант-Андрэа-дэла-Вале, паломніцтва да Святой Брамы ватыканскай базілікі і малітву Ружанца ў Лурдскім гроце ў Ватыканскіх садах.
Папа Францішак, які яшчэ знаходзіцца на рэабілітацыі пасля шпіталізацыі, не зможа асабіста прысутнічаць на мерапрыемствах, але накіруе пісьмовае пасланне ўдзельнікам.
Завяршыцца юбілейная сустрэча 30 сакавіка 2025 года святой Імшой у базіліцы Сант-Андрэа-дэла-Вале, якую ўзначаліць арцыбіскуп Рына Фізікела, прапрэфект Дыкастэрыі па евангелізацыі. Пасля гэтага ўсіх запросяць на бясплатны сімфанічны канцэрт "Missa Papae Francisci" у памяць пра Эніа Марыконэ, які стане часткай серыі сустрэч на тэму "Юбілей – гэта культура".
Чарговая юбілейная падзея падкрэслівае важнасць місіі Місіянераў Міласэрнасці і іх ролю ў распаўсюджванні Божай міласэрнасці і надзеі ў свеце.
