Папа падтрымаў місію Краеўскага ва Украіне тэлефонным званком
Аляксандр Амяльчэня - Vatican News
"Ён сагрэў нас гэтым тэлефонным званком, і яго бласлаўленне ўмацоўвае нас у тым, што мы робім добрыя справы, згодныя з Евангеллем", - падзяліўся папскі элемазінарый з “Vatican News”.
Распавядаючы пра свой візіт, Краеўскі адзначыў, што правёў вельмі інтэнсіўны дзень у Запарожжы. Ён пачаўся ў 5 гадзін раніцы сустрэчай з людзьмі, якія з ранніх гадзін стаялі ў чарзе, каб у 9 гадзін атрымаць вельмі сціплую ежу: паўбуханкі хлеба, дзве бляшанкі кансерваў і два пакеты з кітайскімі супамі.
Кардынал наведаў таксама альбертынаў і іх пякарню. "Я паабяцаў ім новую печ ад Святога Айца", - дадаў ён. Пасля гэтага ён сустрэўся з кіраўніцтвам мясцовай службы аховы здароўя.
"Ім былі перададзены машыны хуткай дапамогі і лекі вартасцю больш за 200 тысяч еўра, сабраныя ў Неапалі і затым перавезеныя ў Фларэнцыю, дзе мы запакавалі іх у набытыя там машыны хуткай дапамогі. Мы праехалі на іх больш за 3300 кіламетраў", - нагадаў іерарх.
Ён дадаў, што ва Украіну прывёз таксама іншыя лекі, якія атрымаў з Клінікі “Джэмэлі” і Ватыканскай аптэкі. Гэта перш за ўсё лекі, якія ратуюць жыццё ў машынах хуткай дапамогі.
Чарговая місія прэфекта Дыкастэрыі па міласэрным служэнні завяршылася і ён вяртаецца ў Рым.
